Coronalia | Dauwtrappen

Um now te zeggen da'w net zo vrog as vrogger op de fietse zatten, náe. Maor wieters vulen't weer een betjen as van olds. De bände op epompt en een toete gesmeerde breudjes in de fietsentasse. Hooguut de flesse Exota in eruild veur Chocomel. Toen heersen der weliswaor gin coronavirus, maor angaon in't café was d'r tóch amper bi-j. Wál moste wi-j van onze olders onderweg argens naor een kerke: “Míts den los was natuurlijk.” Wi-j hebt dat nooit econtroleerd. (en zee aevenmin.) Ik realiseern mi-j dat ze dizzen Hemelvaartsdag dichte wazzen. Dat hef zich aoverigens dankzij internet prima op elost!
Wieters he'w vaste steld da-w toentertied tussen zes en acht 's morgens gemiddeld méér tröppe fietsers op de weg zaggen, as now tussen negen en twalef. Wal mo'k zeggen dat vanwaege't neudige afstandhollen de combinatie 'teggenliggers en kroelzand' enige stuurmanskunst vargen. Had natuurlijk alles te maken met de inmiddels goed ingebörgerde knooppuntenroutes. (Vrogger ha'w maor éne route en den kennen wi-j algauw uut de kop: “Naor't Montferland!”) Afijn, volgens mi-j was d'r de pret niet minder umme; toen neet en now ok neet. Uiteraard bun'k d'r mi-j van bewust da'w 't hier aover d'n Achterhoek hebt. Waor wi-j, is ons opni-j weer's op evallen, veurlopig nog ruumte zat hebt! Da's natuurlijk in't westen wal effen anders. Dat zag i-j duudelijk 's aovends op't journaal. Trouwens, now't der toch aover hebt: Soms he'k stark et gevuul da'w ons teggenswaordig op een soort van 'Knooppunt in de Tied' bevindt. Da'w – wie wet- is effen stille mot staon bi-j hóe- en waorhén wi-j eigelek wieter wilt in onze weld. Da'w misschien as mens (en dier?) wat minder op énen hoop mot kroepen. Ok al kump ons dat in de knippe. Tevens zo'w hier dan misschien wal een endjen op motten schoeven. He'w metene minder kramp aover de krimp…

Sien o Niem