Lezers schrijven | 'Ome Willem'
Algemeen'Ome Willem…'
't Zeukplaatjen van veurige waeke, angaonde 't vroggere bestuur van de FAM was veur mi-j een feest van herkenning. Dat gold niet allene mien naeve Jan ter Haar wiet de foto had an elaeverd. Op éne nao, kwammen ze mi-j allemaole bekend veur. Toch gingen miene herinneringen veural naor – volgens mien één van de oprichters toentertied- de heeer G.W. ter Haar. Oftewal, veur mien gezien van herkomst: “Ome Willem uut Aalten!”
Ik wil neet metene opscheppen dat hee onze familie 'status' gof, maor wi-j beweern altied graag dat sinds hee in de 'Achterstraote' een varf- en behangwinkel bestiern, dezelve ummedeupt was tut Prinsenstraote. Dat was geschiedkundigen onzin, maar daor hiele wi-j ons toen nog niet met bezig.
Nae, den status had in onze ogen grotendeels te maken met 't feit dat 't betreffende bedrief uutgreuien tut dé spölgoedwinkel van Aalten! Now wazze wi-j thuus weinig gewünd qua luxe en ons spölgrei beston in beginsel veural uut materiaal 'wat veur iets anders was uut evonnen', maor wi-j vervolgens met naor de zandbak of slaopkamer slöppen.
Máor éne kere in't jaor! Met Sunterklaos! Dan was't bi-j ons groot feest! Stokke wi-j bi-j wieze van spraeken de ganse buurte de ogen uut met onze cadootjes! Heel soms zat daor misschien wal's een onherkenbaor dutjen' in, of een miniem beschadigd heuksken an een spöllekesdoze. Maor een kniesoor wiet daor op letten. Laot staon wi-j, kinder van d'n Heisterkamp…'t Hef nog jaorn eduurd veur 't hele zeuvental d'r achter was dat wi-j wal een hélen bezundern Huus-Sunterklaos hadden. En 't is mi-j een plezier um dat éndelijk maor's te onthullen...
Ankh Gussinklo (veurhen Annie v.d. Heisterkamp)
