Coronalia | Bewaegen
Algemeen't Zol zomaor können dat de ene helfte van owleu dech dat de weld de leste tied zo ongeveer stille hef estaon, en de andere helfte von datte 'op kop ston'. Zélf – een betjen an de zietliene zittend – he'k veural 't gevuul dat d'r juust heel völle in bewaeging is. Na já, tenslotte beston vrogger op de 'Gimmestiek' het onvolprezen bewaegen ok veur een deel uut 'kopstand' (en handstand én tankrollen...) Ha'k trouwens nog genóg met te doene maor dit terzijde, alhoewal: Misschien is (en was) in bewaeging kommen' sowieso veur völle leu nog niet ens zo makkelijk!? Maor dán now! Naodat eerst 't grote gros tut thuusblieven veroordeeld was – en umgekeerd aevenraedig De Zorg in d'n hoogsten stand kwam te staon – kump onderhand stomp iederene in bewaeging. En dit kere amper met spandeuke e.d. maor veurnamelijk met ni-je ideeën en meugelijkheden. Vake noodgedwongen maor tóch! En natuurlijk geet helaas lang neet alles metene vanzélf. Nem alleen al 't aeven lastige as verdrietige Verpleeghuusbeleid!
Los daorvan; at een Minister-president de jongeren opröp um met te denken aover hun toekomst… En dee dan ok a la minuut in de bene klimt um een 'Bewaeging' te vormen, dan is ter nog een hoop hoppe. Ok veur de olderen wallicht. Of de Sportscholen etc. Want raeken maor dat 't Corona-Crisisteam inmiddels ok wal met – pakweg – bewaegprofessor Scherder en sportanjager Boomsma um de taofel hebt ezaeten, um te heurn wat déé zich allange bedacht hadden. Immers, of't belang now lig bi-j de sportscholen, of bi-j de mensen wiet – al dan neet met frissen mood – meer wilt (of mot) bewaegen, da's niet belangriek. At 't maor gebeurd! Hoe dan ok zie'k egals meer 'Bewaegingen' op gang kommen: “Met Minder veur Zichzelf en Meer veur Mekare!” At dee óóit kans van slagen hebt, dan is't nów...
Sien o Niem
