Markt in kerstsfeer
Toen ik veurige waeke den foto van Harm Baas in Aalten Veuruut teggenkwam, rollen de herinneringen acuut miene baovenkamer in en uut...
Hoewal wonnend in 't buuteengebied, hiel ik mi-j medio jaoren '60 aoverdag veural op in't centrum van 't darp.
Dat had te maken met 't feit da'k van 'brood bezorgen' mienen stiel had emaakt. Na ja, in feite was mien moder, toen ze de 'vacture' in A.V. had elaezen, naor 't 'Heuksken' efietst um veurspraok te doene.
Toen ze thuus kwam, ha'k mien 1e baantjen in tesse.
Zodoende he'k as 'bakvis' al 'slierend langs de straoten' mien eigen bottram verdiend. Dit deur dagelijks - mét baas en bestel-dafjen - datzelfde brood uut te venten. Móói wark toch?!
Bovvendien kwam i-j nogal es volk teggen wiet ok op zonne maniere de kost verdienen. Zoas dor waar'n de gruunteboer op zienen scooter, de meteropnemmer met zien täsken en -uiteraard- de man met de melkkaore...
Op zich von'k 't een redelijk gemuutelijk baantjen, al was't altied weer anpoten um alles optied rond te kriegen.
Trouwens; met Sunterklaos en Karsmis was 't helemaol een heksenkaetel.
Dan leep i-j ow van 's morgens vrog tut 's aovends late de bene in de knuppe.
Dit vanwaege alle meugelijke éxtra warme-bakkers-producten. Vérs uut de bakkeri-je! Ik wet nów nog da'k in al dee vier jaor gin enkelen eersten kerstdag 'bewust heb met emaakt'.
He'k 't nog niet aover at 's winters spekglad was. Ooit ging ene van 'onze' bakkersjonges argens bi-j d'n Darden Brookdiek (toen nog zandweg(!) finaal onderuut met ziene bakkersfietsmande
Een dag later zagge wi-j de grieze stoeten drieven in de Keizersbaeke…
Kortum; ik heb mien in dee jaoren gin moment hoeven te vervelen. En 't loontuutjen elken zaoterdagaovend (incl. 'n Rozienenstuutjen veur thuus) vergoeden de rest…
En - als klap op de vuurpiele – hef den baas van toen, mien halve riebewies bekostigd. (He'k ongetwiefeld bi-j dat (verlechte) gemeentehuus op ehaald...)
Ankh Gussinklo
