Boemerangeffect

11 december 2021, 09:00 Algemeen

Boemerangeffect

Op gevaor af dat dizze schrieveri-je op’t moment van plaatsing al gin ‘urgentie’ meer hef, doe’k toch een gooi.
Al is’t maor um wat te doene te hemmen. (Hoezó urgentie...)

Want, dit ezegd hemmend, spölt mi-j toch egals iets deur de kop, wa’k geerne met ow as laezer zol willen delen.
Een fenomeen dat - met permissie - vandage d’n dag bi-j zowat alles waor ‘t woord crisis achteran kump, een rolle spölt.

Now wi’k véur alles duudelijk hemmen da’k nargens völle verstand van hebbe, laot staon een oplossing.
Kortumme: ik doe ok maor wat..:

Ik lete mi-j tweemaol prikken, gao t.z.t. zéker hen ‘boostern’, holle mi-j ongeveer an álle - veranderende - covidregels en arger mi-j met horten gruun an’t gezwalk en gedröttel in Den Haag.
Vóórts bun’k veur zowat alle klimaatregels en vin’k zéker da’w vluchtelingen niet mot laoten verkommeren enz. enz. En tóch…

Tóch bun’k heel bli-j dat in ons parlement een ‘vaccinatieplicht’ (tut now too(?!) nog egals een taboe is. Want we’j wat ‘t -volgens mi-j- is?
Alles wao-j een mense toe dwingt, warkt averechts: Wordt de hakken in’t zand ezet, de konte teggen de krib egooid en nóg wieter in de ächterbokse ekroppen.

Da’s alzenlaeven nog zo ewest; Of ‘t now aover vaccineern geet, aover windmöllens kort bi-j huus, minder poggen, beeste of hoonder hollen, zowal as crisisopvang in’t darp.
En anders kom i-j’t wal teggen bi-j de opvoeding van de kinder. Ku’j duuzend maol zeggen: “Lúústern zölt ze!” Maor Fúte! Vrogger warken dat misschien nog, maor teggenswoordig ku’j ‘t schudden.

Want wat rest is uutendelijk ‘t z.g. Boemerangeffect. ‘t Keert zich teggen ow, krie’j de grootste kaskenade en bu-j nóg völle wieter van huus...

We’j; Misschien is praoten, luustern én mekare echt in de ogen kieken walbeschouwd ‘t beste recept daorteggen.
En ‘t liefste zonder achteraf “Ik hád ‘t ow toch ezégd?!?” te smiestern.

Want íeder mense wil now eenmaol zien eigen wiel uutvinnen...

Ankh Gussinklo