In wat veur zommer…
We'j 't nog? Veurig jaor in d'n eersten lockdown? Wat veur sfeer d'r heersen in ons land? Naost alle verbijstering en ongeleuf aover wat ons aoverkwam? Was dat neet een bezunder soort van Verbinding met mekare? Soms host een betjen magisch?
Natuurlijk, we-w allemaole dat 't daornao ok – zacht gezegd – wal weer wat inkakken. D'r zelfs een hoop kaskenade (laes: onbegrip) ontston. Maor tóch..!
't Wil d'r bi-j mi-j neet in dat 't gros van ons neet geveulig is veur zo'n verbondenheid. Kortbi-j en wiedweg.
Dat zie'j now ok weer gebeurn bi-j 't Voetballen.
Ons chauvinisme – wat bi-j anvang, lao'w eerlijk waen, nog maor mondjesmaot postvatten - viert inmiddels bi-j elk doelpunt van Oranje meer hoogtij.
En vanzelfspraekend; d'r is een hoop ambitie, competitie en concurrentie onder mekare tiedens zo'n EK. Dat heurt d'r gewoon bi-j.
Toch bun'k altied weer verbaasd dat dee voetballers zélf zich mekare twee maol aover dri-j kwartier 't laeven zoer könt maken, maor nao 't endsignaal de teggenstander weer vriendschappelijk op de scholder slaot. Of ze now verlaorne hebt of e wonnen. (Althans tut op dit moment van dit schrieven nog...)
Wa'k persoonlijk trouwens ók mooi vinne, is al dee kleurn op 't veld. Bedoel ik niet allene 't Oranje en al dee andere fleurige voetbaltenues, maor ok de verscheidenheid in huidskleure.
Zwart, Broen of Wit, et me'k gin mense een bál uut. At ze maor voetballen könt, sloet wi-j ze in ons hart.
Starker nog: 't is misschien een betjen teggen 't zere been van 'zeer extreem rechts', maor ik waoge te stellen da'w allebastend bli-j meugt waen dat ons Oranje-elftal zó riek geschakeerd is...
Trouwens, a'w 't dan tóch aover eventuele zere bene hebt, gooi ik ok nog maor effen de Raegenbaogkleurn in de groep.
En denk now neet: “Wat hef dát no met voetballen te maken?”
Liekt mi-j niet meer van dizze tied...
Ankh Gussinklo