In wat veur tied…(5)
Elken maondagmorgen a'k de veters van de wandelschoone strikke, bun'k weer beni-jd of 'k misschien een begin van 'onze' twee belofde Uuthuuskes zie verrijzen. En verduld; veurige waeke zag ik d'r een glimp van. Allenig stonnen ze (nog) neet op D'n Nestiezern, maor op een groten foto in Aalten Veuruut.
Dat waarn d'r trouwens al dri-j, en ze staot op de Haort.
Kortum; 't begin is d'r en dat güf de (startenden) börger mood.
In't begin dacht ik dat 'Uuthuuskes' zo heiten umda'j d'r binnen een bepaolden tied weer uutmot. Dát ok, jao. Maor feitelijk hef 't simpelweg te maken met 't “uut-huus-gaon” van jongeleu. Ná; Mooi toch!?
Aevenens begriep ik uut de 'Gemeentepraot' dat zo good as alle politieke parti-jen zich onderhand de mouwen opstreupt angaonde de (toekomstige) Wonningbouw in Aalten. Ok prachtig! En hárd neudig ok!
Aoverigens hebbe wi-jzelf al jaor en dag – en ok onze kinder -'t geluk um sowieso in een fijn thuushuus te wonnen. Dus heur i-j mi-j niet klagen. En tóch..!
Toch blif d'r mi-j iets krange zitten. (Ok al is't veur 'protest' helaas al te late.)
't Betröf namelijk de prangende vraoge wáorum 't kennelijk zo neudig was um 't betjen illegale “won-genot” - wat tóch al tig jaor 'edoogd wier - júúst in een periode dat elken vierkanten meter wonruumte d'r ene is, maor's duftig an te pakken. Asof een mense neet wat anders an de kop hef, vandage d'n dag.
Tuurlijk wet 'miene olde bokse' (zei mien moder vrogger altied) dat iets illegaals niet légaal is. En dús per definitie weinig 'recht van spraeken' hef.
Of... mag -bi-jveurbeeld- (wonning)nood ok nog 's een kere een wet braeken?
Immers, um welk belang dreeit 't now eigenlijk? Um de politiek of de börger? Um (prins) Bernard of Jan met de Pet?
Wiet 't wet mag't mi-j zeggen...
Ankh Gussinklo