In wat veur tied…(4)

In wat veur tied…(4)

I-j könt gin krante losslaon of i-j laest aover weerstand teggen van alles en nog wat. Of 't now de windmöllens bunt, de zonne-energieweidens of 't stikstofbeleid, steevaste gaot argens de hakken in't zand.

Terwijl wi-j ons toch onderhand best bewust bunt dat d'r een hoop mot verandern!

Now mo'k toegevven dat ik ok neet wette wa'k doon zol at zich achter 't huus zoiets veur onze ogen zol voltrekken.

Laot staon da'k een idee hebbe hoe't 't dan wál mot…

Afijn; zodoonde kwam ik an't denken aover hoe't dat vrogger dan ging. Want d'r hef toch waarachtig de vergangen eeuwen wal meer espöld op 't gebied van veranderingen in't landschap, zo'k zeggen.

Nemp de kanalen wiet wiern egraven. De treinen inclusief 't geloed, 't gevaor en de spoorbanen. Of de Zuuderzee wiet wier in epolderd en dat soort ni-jigheid. Van hoogspanningspaole, graansilo's, ruilverkaveling, waterleiding en riolering tut ollie- en gaswinning en wolkenkrabbers.

Zol Neerlands volk dat metene allemaole zo geweldig hemmen evonnen?

Ik wet van een veurvader wiet, toen de hoogspanningsdraode lieke aover zien arf hen dreigen te gaon, zei: “Niet anders as aover mien liek!”

Maor ze bunt d'r wal ekommen…

Van de andere kante he'w ok familie, wiet al z'n laeven al pal an de spoorbane wont: “Dee raakt pas écht 'van't rit raakt at d'n trein een kere een half uur aoverslöt.”

Baovendien; is 't merendeel van de bouwwarken wiet qua hoogte ooit de kop ok aardig wiet bovven 't meeiveld uutstökken – de kerk(toorns) en de möllen(wieken) bi-jveurbeeld – inmiddels niet tut Historisch Arfgood bestempeld? Kortum; zég 't maor…

Aoverigens is met de wiesheid van now ok eblekken dat niet élke verandering ok een verbaetering was. Allene daorum al liekt 't mi-j niet verkeerd dat zowal de politiek as de börger eerst heel góód naor mekare luustert.

Of… um 't naor d'n titel van 't ni-jste book van Jan Terlouw te vertalen:

“Mensen, 't is lástig maor 't kán...”

Ankh Gussinklo