In wat veur tied…(3)
No't gelukkig heel langzaaman egals weer een betjen meer reuring in ons land meugelijk is, mot mi-j toch iets van 't hart.
Begriep mien good; ik heb een haekel an al dat geneul op 'Het Beleid' ('zee doet ok maor wat') maor tóch: Dat -tút vandage too- de Kunst en de Cultuur 'as 't spraekwoordelijke ondergeschaoven kindjen zo an de leste memme kwam te liggen, begon toch wal op te vallen. Terwijl – ik zeg maor's wat – een museum of een angepast(!) theater now niet direct 't allergrootste virusverspreidingsgebied is.
Waorum kon dat dan toch zo gebeurn?
Umdat 't economisch niet interessant wordt e acht? Vanwaegen dat kunstenaars en -liefhebbers niet met een spandook de straote op gaot? Deurdat ze blíeft probeern um op een andere Creatieve maniere iets neer te zetten? Misschien umdat't de 'Linkse Kerke' maor is?
Wie 't wet mag et zeggen…
Toch is 't juust in't afgelopen jaor weer zó duudelijk eworden, dat kunst, in wélke vorm dan ok, onmisbaor is veur de - mentale- gezondheid van een mense.
In't zondagse tillevisieprogramma Buitenhof zei Ann Demeester, een bevlaogen kunstliefhebber, 't korts een kere zó:
“Kunst en Cultuur is geen ongezonde snack, maar een onderdeel van de Schijf van Vijf!” Dat blef bi-j mi-j hangen en ik most denken an wat in de vrogste eeuwen al een 'wet' was: “Gef et volk Brood en Spelen!”
As klein deerntjen dacht ik dan altied an't krintebreudjen en de kinderspöllekes op 't Schoolfeest. Met de 'wiesheid van now' bekiek ik't iets ruumer natuurlijk. En besef ik tevens dat 't écht niet allenig was/is um't volk zeute te hollen.
Immers; of 't now een Bevrijdingsmuseum is- of 't Rijks, (want zoiets hölt ons 'scharp(!), de Koppelkerke of de Zwarte Cross, 't Songfestival, de Olympische Spelen, een Concert of onze eigen Zang- Muziek- of Sportvereniging: Het verbündt ons met mekare.
En het voedt ons..!
Ankh Gussinko