In wat veur land…(7)
Elken morgen geniet ik al wandelend van de stilte op D'n Nestiezern. Los van een enkelen hondenuutlaoter en een paar hobbyhennen zie'k gin kip.
Nóg mooier host vin'k trouwens a'k dan de schoolkinder teggenkomme. Lopend of fietsend met mama, papa of gastolder. Probeert zo'n kleinen potwortel dan ok nog eur händjen op te staeken um mi-j vrolijk te begroeten, bun'k helemaols gelukkig. En a'k dan tenslotte 't volle schoolfietsenhok zee, denk ik: 'Dee (aoverigens broodneudige) campagne um kinder al fietsend de verkeersregels bi-j te brengen, hef hier kennelijk al bi-jveurbaat ewarkt.'
Now hef een buurtschapskind dee kennis natuurlijk ok hard neudig. Allenig al umdat ze straks veur eur wietere onderwies naor Aalten mot fietsen.
Aover Onderwies en Kennis esprokken: In al dee ándere campagnes van de afgelopen tied heure wi-j daor – terécht - het grote belang van. Wat mien betreft wordt dat, naost Zorg, Gelieke Kansen en Klimaat, één van de grote uutdagingen van de toekomst.
En dan veurál: 'Kleinere klassen en méér juffen en meisters d'r veur! Zodat ze wérkelijken andacht an élk kind könt bestaen.' Hef dat aoverigens altied allenig maor met 'kennis' van raekenen, taal en aardrijkskunde te maken? 'k Wet nee...
Op facebook laezen ik een artikel van een (kleuter)juf (jao waarachtig, ze bestaot nog, al nuumt ze't misschien now anders).
Naost dat zee zó allebastend bli-j was dat ze 'eure' kinderkes weer in't echie zag, beschreef ze – vol passie en aovertuging – dat een kind ók een hoop (van't laeven) kan leern wanneer niet alles vanzelf 'crisisproof' geet. Dat zoiets niet per see 'zielig' hoeft te waen, althans at dit goed begeleid wordt. En dat een (onderwies)minister dan niet metene aover 'zittenblieven' hooft te schrieven.
Zoiets motiveert menig kind allesbehalve. “Nuum 't dán liever een bonusjaor”, was eur advies.
't Was mi-j uut 't harte egreppen!
Ankh Gussinklo