In wat veur land...(3)
Op't moment van schrieven (maondag 8 februari) zit ik achter de schoefpui met et zicht op een metershogen sneebarg. De waege bunt naogenog onbegaonbaor, de treinen riedt niet, de vliegtuge vliegt niet, de krante kump niet. De gravens bunt bevroorne en iesbloemen versiert de roeten! Kortum; de lockdown is completer as ooit!
I-j könt ok zeggen: mooier afwisseling ha'w ons neet können bedenken.
Maor da's natuurlijk te makkelijk ezegd. Want de prik- en testlocaties mosten tiedelijk dichte (14.000 leu wiet afezegd mosten worden(!). De scholen zollen net weer los, maor kregen inplaatse snee- en iesvri-j. Half Nederland wol 's zondags langlaufen, wandelen of met de kinder sleeën, maor daor was't veur de meesten te kold veur. Geluk bi-j 'n ongeluk trouwens, want zoodoonde gin aoverlast op de Posbank, Montferland of Vennebulten.
He'k 't nog neet aover de iesbanen wiet zich grotendeels onder de snee verstopt hebt. Laot staon da'w ons, nao dik 20 jaor éndelijk weer es könt verheugen op d'n Elfstedentocht. Dat wordt Erben Wennemars, liepend op d'n tillevisie. Daor ku'j op wachten, wat ik ow brom.
Aoverigens, wal fijn dat 't éffen niet aover corona, vaccins of verkiezingen geet. Hoppen dat half meert de snee weg is, en de covidcijfers naor ondern, anders könt ok dee neet ens deurgaon. En dan zit ons land, inclusief 't demissionaire kabinet, per definitie op een gliedende schaole. Kortum; a'j d'r dán nog niet achterkomt dat niet alles in't laeven maakboar is…!
Maor wa'k eigenlijk vraogen wol: “Zol dit now een Kosmischen grap waen, of een Kosmischen boodschap?” Mien man vatten't trouwens nog kernachtiger samen: “Hier kónt ze in elk geval Hugo de Jonge niet de schuld van gevven!”
Toch denk ik da'w achteraf zölt zeggen: “Groter cadeau as de afgelopen waeke ha'w ons nooit zelf können bedenken!”
Ankh Gussinklo