In wat veur land..?
In wat veur land..?
Beste Laezer, vroag i-jleu ow ok wal's af in wat veur land wi-j anno 2021 eigenlijk laeft?
Is dat 'n land waor de premier 'vrolijk' op et fietsken naor de koning slakkert veur 't ontslag van zien kabinet? Of waor -integendeel- ziene onderdanen vindt dat 't hiero egals onveiliger wordt?
Is dit 't land van de vri-je meningsuiting... maor tegelieke lopen neulen dat d'r zowat niks meer kan?
Bu-w terecht de natie van't wiezende vingertjen, of toch van de hand in eigen boezem umdat de botter ons zowat van de kop afdröpt?
Hef onzen Aoverheid now (ter)écht 'allebastend diepe tessen', of haalt ze (een deel van) 't volk 'gewoon' 't vel aover de aorne? (Of beide...)
Lope wi-j as polderlandjen inderdaod nogal veurop, of köttele wi-j net zo vake een betjen achteran?
Wil een meerderheid van't volk redelijkerwies vrae hollen, of mot – at alle stökke braekt- van gif boel dan maor verbouwd?
Met andere weurde; stao'w te völle op 't Malieveld, of te weinig?
En wat is ons grootste (lands)belang: Economische Greui, of hef Welzijn prioriteit?
Bu'w as Nederlanders veural van de tradities, of he'w onderhand ok oge veur de neudige transities? Een volk van 't is vief veur 12!', of meer van ' vuurwark um 12 uur'? Ik bedoel; bu'w gemiddeld genommen aardig progressief of vri-j eigenwies? Wat hef in onszelf de aoverhand; polarisatie of inlaevingsvermogen? Ikke-ikke-ikke of toch uutendelijk de zo geroemde naoberschop?
En de prangendste vraoge: Wie hebt 't vandage d'n dag et slimste; de olden of de jongen?
Kortum; miene verwarring is buutengewoon groot!
Hooguut is één ding zeker: “Veur 't gros van dit alles is helaas gin vaccin…
Ankh Gussinklo