Coronalia | Keuzes ...
No't, althans veurlopig, et virus zich wat hef teruggetrokken, en d'n grootsten Coronakoorts is uut ewoed, krie'w langzaam weer de tied um tut onszelf te kommen. Bi-j te kommen van ingriepende dinge as zeekte, afstandhollen en afscheid. Al hef veural dat leste natuurlijk völle meer tied neudig! Bi-j te tanken nao't onmundig harde warken in de Zorg of – anderszins- de stress probeern los te laoten umdat owe bizzenis stille lei. En ok dee zorgen bunt nog lange neet veurbi-j.
Toch ku'w d'r niet onderuut um ok nao te denken aover: “Wat hef 't ons allemaole ekost, versus wat 't ons now ebracht hef, kortum: “Hoo now wieter?!”
En welke keuzes make wi-j dan vervolgens? Of dat now 'De Politiek' geldt, 'De Economie', of 'De Bórger'. Hoewal dat natuurlijk allemaole deurmekare löp. Immers met z'n allen bu'w 'de Maatschappi-je'.
Ik zeg maor's wat: “Krig endelijk De Zorg 't geld wat eur allange toekwam, of wordt ze (weer!) af escheept met een aalmoes en applaus. Dit onder't mom dat zee (de Politiek(!) neet wet waor ze't vandan mot halen'.
Kom óp zeg!
Kieze wi-j veur: “Zogauw meugelijk weer op d'n olden voet wieter?” Of veur “Iets minder kan misschien ok wal?”
Veur Goedkoop Vliegen en Vleis, of een Duurzamen Knuffel teggen d'n Huidhonger. Oergezond, en nog Gratis ok. (Economie en Maatschappi-je.)
Make wi-j de keuze veur écht luustern naor mekare? Probeern in te zien da'w niet altied alle geliek van de wereld hebt? Of blieve wi-j -eigenwies- egals terugge kroepen naor ons eigen stellingen? (de Börger en consorten.)
Et klunk allemaole misschien een betjen revolutionair En dat is't ok! Maor wi-j könt 't d'r in elk geval – constructief(!)- aover hemmen.
't Liekt mi-j de énige keuze. Althans a'w met mekare wieter wilt in de weld...
Sien o Niem