Coronalia | 'Coronadiploma'
Veurige waeke oppern onzen Börgemeister via dit blad, um is bi-j onszelf nao te gaon welke lessen a'w – persoonlijk en as gemeenschap – misschien op edaone hebt in de afgelopen periode. Ná, dat hoef i-j mi-j natuurlijk maor één kere te vraogen. Wi'k beginnen met't allebastend grote slagingspercentage op de Middelbaore Scholen! I-j mot 't maor veur de kiezen kriegen: Slagen veur een 'Coronadiploma'. En dat zónder't 'cadootjen' van 'n toespraak v.d. mentor, inclusief galafeest in t'veuruutzicht! Dan mag – herexamen of neet – terecht de vlagge uut!
Maor ok as 's lands Overheid, met in't kielzog de börgers, vin'k daw't d'r aover 't algemeen niet slecht hebt af ebracht. In elk geval he'w – net as de scholier'n – ons beste daone, duch mi-j. Wil dit vervolgens zeggen da'w dan ok maor 'gewoon' de schooltasse an de vlaggestok könt hangen? Um da'w alle lessen wal ehad hebt?
Of was dit soms pas 't eerste semester? Mo'w as mens en maatschappi-je misschien nog's een paar vakken extra van de planke pakken. Of juust een pretpakket uut 't agenda schrappen? Bunt d'r kortum nog een stuk of wat examenvraogen blieven liggen?
Aover hoo now wieter in de Verpleegtehuuze bi-jveurbeeld. Naogaon wat van werkelijk laevensbelang is. Veur onze oldere medemens in't bezunder. Of waor schuult w.s. 't meeste coronagevaor? In carnaval, kerken en koren, of parken en pleinen?
Trouwens , aover (volle) pleinen esprokken: Wat is 't meeste constructief? Endelijk een paar lessen trekken uut de vraoge waorum duuzenden mensen massaal de straote opgaot? Of vallen aover pakweg Femke en Ferd? Inzien dat iets wal's minder 'zwart/wit' kan waen dan wa'w misschien altied dachten. Tuurlijk, achteraf is't makkelijk praoten. Maor laern van't verleden is ok nooit weg.
Veurts hop ik dat in de toekomstige geschiedenisbeukskes, dit semester niet wordt op ehangen an een winkelkaore vol closetrollen...
Sien o Niem