Coronalia | Ni-je Normaal ...
Angezeen de Minister President ons in de 'Tussenwaeke' dringend opreep um nao te denken aover het Ni-je Normaal (klûnk as: 'Ni-je Moraal') wil ik niet achterblieven. Ik bedoel; een vleugjen Filosofie van de Kolde Grond mot können.
Kortum, wat betekent veur de gemiddelde mens dee 'Anderhalve-Meter-Maatschappij' (effen los van't 'Normale Gezinslaeven'?)
Wi'k van wal staeken met 't Gin Hande Gevven: "Is niet bepaold handig, maor zal wallicht wennen." D'r steet tegenaover da'w van dee 'Dri-j Klap-Kussen' mooi makkelijk af bunt ekommen.
't Knuffelen daorentegen za'k best missen: "Maor misschien kan't ooit 'Dri-j-D-Digitaal?" Praoten en Zingen kan gelukkig nog volop. Mits met maor een paar personen, en zónder consumptie.
('t Gewone consumeren mag veurasnog gewoon deurgaon!)
Dán de kinder wanneer ze weer naor schole mûgt!!!
Kan'k wal zeggen: "Bokspringen mag neet, maor Touwtjenspringen wal". En "Tikkertjen neet, maor Knikkern wal!" Echter'k betwiefel of de hedendaagse jeugd daormet uut de veute kan, maor ze zölt zich zéker redden!
Veur ónze laeftied geldt:"Wandelen? Zéker!" In owen eenmoed, of elks an'n kante van't pad, naor veurkeur.
"Fietsen? Ok Prima!" Mits i'j d'r ginne op d'n pakkendrager of stange metnempt. En zeker neet tropsgewieze. (n.b. Geldt ok veur Wielrenners, Scooters en Motors!) Maor wa'j ok verkiest: "Kóffie Metnemmen!" 't Twalleteern blif problematisch, zéker zolange de mais laege is. En met dizze dreugte…? 'kWet neet? Afijn, d'r blif altied wat te wensen aover. En dit op een helen hoop coronapunten helaas...
Voorts geet de mare: "A'j iets maor hárd genog wenst, dit zeker óóit uutkump! "Maor ok daor zit een 'maor' an", zegt ze d'rbi-j. Klópt! Gao maor's nao: "Wensen i-j jaorenlange een stark dalende benzinepries, en now we-j neet ens waor'j' es hén zölt vuurn."
Of he'j éndelijk den dikken spaorraekening ten einde te renteniern, en dan mo'j d'r uutendelijk inplaatse veur 'boeten'.
Inderdaod: "Niet Normaal…"
Sien o Niem