Coronalia | Piepklein ...
Onveurstelbaor wat zo'n piepklein dink in de grote weld tewaege kan brengen. Inderdaod, pakweg honderd jaor gelaene – én langer - gebeurn dat ok al. Maor wiste wi-j völle, as 'nao-oologse' generatie? "Wi-j waarn een halven eeuw trugge banger veur 'vierrussen' as veur één virus", laezen ik op 'Insta'. Stárker; hoe ha'w toentertied ok maor können bevróeden dat in 2020 zodoende met Paosen de kerken dichte zollen waen en de wonwinkels los? ('Boelevaard' was toen bloots Zandvoort-an-Zee.) Awell; Inmiddels (s)praekt ok de kerken onderhand een perfecten 'Digi-Taal', dus da's te aoverzeen.
Zelf realiseer ik mi-j sinds kort trouwens ok dat mienen man en ik ons host gelukkig meugt priezen da'w gin olders (meer) hebt, wiet old en eenzaam, achter de roeten van't Verpleeghuus zit. Waor i-j ze dan hooguut effen deur könt handkussen en zwaaien. Um aover een eventueel afscheid nog maor te zwiegen. Hártenbraekend! Veur eure kinder én veur't zorgpersoneel.
Tevens hebbe wi-j de kleinkinder inmiddels zo groot da'w d'r al neet meer zo vreselijk 'lijfelijk' verlenkelijk naor bunt. Een eppjen of foto op feesbook dut ok al een hoop. Maor'k heure ok van grootolders wiet zich zorgen maakt aover b.v. al die ingewikkelde coronatoestanden in de gezinnen van eur naokroost. Vervolgens verkast ze zelf dan een lang-weekend naor dri-jhoogachter, zodat 't kinderspul zich effen kan uutbanjern op éur achterarf! Ok bunt d'r ongetwiefeld oma's (en opa's) wiet de traone verbiet, allene al bi-j't idee dat zee ze misschien nog in gin zes waeke môcht knuffelen of oppassen.
Laot staon dat pasgeboren hummeltjen, waorvan a-j allene maor achter't veurkamerraam könt genieten. En dan nog heur ik ze niet klagen! "Wánt ze hebt de 'beelden' nog!"
Maor áevengood; zoat ooit een ni-jbakken opa, wiet een eerste kleinkind in Paries had, ons toovertrouwen: "Een Kleinkind mo'j Róeken!" En zo is't maor nét…
Sien o Niem