Kolk

30 maart 2019, 13:23

Wi'j as Dinxpèrsen wet allemoale hoe raar at soms de kronkelgedachten bunt van de luu wie't meent 't hier veur 't zeggen te hebben. Al vakèr bunt duftig wat wenkbrauwen umhoge 'egoan a'j in de gaten kregen wat ze zich now weer hebt bedacht. Dit keer kwam ik toevallig in 't bezit van 't 'to-do-liesken' (zo heit dat doar) van gemeentewerken wo'at op steet wat d'r nog gebeuren mot. En mi'j zakken de manchesterse bokse van 't gat toen ik zagge wat op nummèr 1 boven an steet: de kolk zal gans leug wodden 'epompt! Um te veurkommen dat de eerbaarheid zol wodden 'eschonden he'k sofort de boksenboord 'egroppen, 't dink umhoge 'eheist en de riem één gat strakkèr an'etrokken. Ut tweede wa'k 'edoan hebbe is d'n tillefoon 'egroppen en 'evroagd um uutleg. Jaahaa, in eur wiesheid wilt ze doar wetten of de boadem van de kolk ook vervuild is met een hoop troep, fietsen, gresmèèjèrs, pannen en andèr scheurdegrei of wat dan ook. Joa moar, woar wil i'j dan al dat watèr loaten? Ooooh, in een paar dage könne wi'j een waterleidingpiepe anleggen met een pompe d'r tussen noar de Strank. Oooow, dus 't mag wat kosten! Neeeh, dat he'w en doe'w allemoale eiges. Ach ja, domme vroage van mi'j. Ze zollen ook 's….. En wanneer geet dat allemoale gebeuren? Tut mien schrik zeien ze dat ze net vandage an'efangen wazzen met 't in mekare schoeven van de afvoerpiepen. Joa, goat moar 's gauw kieken. Ut kan wean dat d'r nog wat watèr in zit, andèrs zie'j meschien nog wat vissen sparteln. Moar in tied a'j dit least kan de kolk ook al gans dreuge wean. Bwooaahh…, en noa 't opruumen van de pröttel weer een kladde watèr d'r in? Oooh, dat wette wi'j nog neet, euhh… niet. Tut zo wiet reikt schienboar 't ovèrzicht niet van die beste luu doar. Un letste vroage: is dit 't enigste natuurbad in de gemeente wat wödt leug 'epompt? Toen begon de lijn te kraken, ik kon d'r weinig van maken. Ik menen zoiets te heuren in de tongval van 0543: joawalfort. Snap i'j 't nog?

Hol ow goed!

H. Eurneman