Inderdoad

Een doad stellen. Dat is wat 't kollege van onze gemeente in gedachten hef. Duurzaam is prima en dichtebi'j lik mi'j logisch. Veurige wèke wier in dit onvolprezen wèèkblad doar melding van 'emaakt. Wat mi'j opviel was de reklame wie't dr veur 'emaakt wier. Hele mooie volzinnen bunt d'r veur bedacht um te loaten wetten dat now de 3-D uutvoering an de orde is. En ene doarvan is doadkrachtig. Samen met de olde-jonges-krentebrood foto van de zes blauwjassen d'r bi'j mo'w dan onder d'n indruk wean. Ut eerste wat now pas goed opvölt: de mensheid in onze gemeente besteet bliekboar allenig moar uut kearls, d'r steet gin ene deerne op…..
En now de D van doadkrachtig. Met de letste koalitievorming in 't veurjoar he'w inderdoad 'ezien wat doadkracht inhölt. Effen wat noar ow toerèkenen en dan krieg i'j een mooi veurbeeld dat de democratie hef 'ewonnen moar niet 't gezond verstand. Dat d'r een groten groep kiezèrs met vroagteikens blieft zitten is veur hun niet an de orde. Zo maak i'j eiges de afstand nog grotèr tussen kiezèrs en kollege. Tussen Dinxpèr en 0543. En now is 't zoas 't is…..
Doadkrachtig wil zeggen da'j now 's goat doene wat in 't belang is van ow eigen inwonèrs. Doar wo'j 't van hebben mot. Iederene geliek behandelen. D'r bunt genog veurbeelden te nuumen in de letste 13 joar van gevallen van ongelieke behandeling. In 't begin is hardop 'ezegd deur verantwoordeluken dat beide dörpe gelieke waren. Dat is nooit um'ezet in doadkracht. En dat zol now wel gebeuren??
De hoppe is nog egals gevestigd op uutsproaken wie't de ni'je börgemeistèr een hötjen geleden 'edoan hef. Wi'j bunt zeer beni'jd of hie dat ook in doadkracht kan ummezetten. Van 't wegwarken van gruune beumkes en andere inktvlekken in dit wèèkblad, 't veranderen van de gemeentenaam tut 't openen van een kantoor veur börgèrzaken in 't olde gemeentehuus. Ruumte zat te huur! En alles wat doar tussen zit. Een helen waslieste van wensen um de verschillen in de beide dörpe weer ongedoan te maken.
De 3-D uutvoering van de gemeente kenne wi'j now. En now doene wa'j beloofd! DOAD: Denk Ook An Dinxpèr!

Hol ow goed!
H. Eurneman