Werk
Ja, wi'j bunt dr weer, könt dr völle zeggen! Terugge van weg 'ewest. Van meschien een mooie vekantie in een zonnig en warm land. Beveurbeeld in ons land. Wat een temperaturen he'w 'ehad. Wat een zonne is dr 'ewest. Doar konnen de weergoden in 't zuuden van Europa niet tegen an. I'j mosten allenig zörgen da'j genog te drinken kregen. Ut beste zondèr alcohol. Nah ja veuruut dan, ovèrdag. In de oavend mag dr best een bierken of een wientjen van af. En dr zal duftig wat 'egrild wezen. Anbiedingen genog in de winkels hier in darp. En veur de sportiviteit efkes op 't fietsken hier hen of doar hen en zo kom i'j d'n dag wel deur. Wietèrs mos i'j niet vergèten um op tied ow met grei in te smeren um niet te verbrannen. Ze zegt wel 's dat mooi rood niet lelijk is moar dat zal toch niet de bedoeling wèzen. Was faktor 50 genog?
As of 't niet genog is 'ewest met dat mooie weer bunt now de temperaturen "gedaald" tut een wat aangenamèr niveau. Een buj'ken regen zo dann und wann is neudig. En de zonne kump dr dan ook wel weer mooi achtèr hen.
En op d'n arbeid bu'j ook terugge van weg 'ewest. Meschien um af te tellen wanneer de kommende vri'je dagen bunt. Nog zo en zo volle wèken en dan bu'w weer vri'j. Op zich niks mis met. Moar a'j gezond bunt en könt arbeiden telt meer. Dr is weer genog te plennen, te regelen, te maken, te telefoneren, te mailen. I'j mot hier an denken en dat niet vergèten. Kortom, d'n droad weer oppakken en zien da'j 't weer an de genge kriegt. Met d'n tank weer vol kö'j dr weer een hötte tegen an!
I'j vernemt 't wel: tis now komkommèrtied. Een pröatjen over 't weer en d'n arbeid. Um dr weer in te kommen. Um weer te proberen elke wèke een onderwerp te vinden en een mening doar ovèr te geven. En um te zien of an dat ondèrwerp de neudige zin met te geven is. Want dr is al onzin genog in disse welt.
Hol ow goed!
H. Eurneman