Weer
Ut warme weer hölt moar an. Tussen alle werkzaam- en andere bedrievigheden deur wödt dan toch moar van ow verwacht da'j de kop dr bi'j holt. En dan mot veur de meeste luu de vekansie nog kommen. Wat de temperatuur angeet kö'j wel tuus blieven. Maak ow dan allenig moar drok um wat te plennen: een fietstochjen, hoe'n boek za'k 's lèzen, wanneer een ijsco, stèke wi'j now of straks de barbekjoe an, drink ik een water, een wientjen of een pilsjen. Dan he'j vekansie!
Hier in darp was en is dr genog te doene (ewest). De schuttèrsfeesten in de Zoerik en in Dinxpèr bunt veurbi'j. Duftig wat luu hadden de vogel dr'af en bunt tut majesteiten 'ekroond. Een goed veurbeeld van gemeenschapszin was weer te bewondèrn op de farm en country fair op d'n Stiezèrn. Het weer droeg dr ook een steentjen an bi'j: dreuge en niet te warm of te kold.
En at 't ow buuten toch te heite wödt kö'j ow altied nog terugge trekken in een koele kamer en noar de tillevisie kieken. An sporten ontbrök 't niet in disse tied: voetballen in Rusland, tannis in Londen, racefietsen in Frankriek. Of volg i'j lievèr de actualiteiten of kiek i'j lievèr noar een film? Kan ook.
En dan bunt nog andere meugelijkheden um hier in de buurte de zinnen te verzetten. Slentèr 's over de zommèrbraderie of goat noar 't zommèrconcert van 't Heurns Mannenkoor. In disse wèke en 't kommend wiekent is 't gewoon moeilijk kiezen uit duftig wat uutgoansgebeurtenissen. Vanaf woensdag tut en met zondag is dr feest in het oranje gekleurde De Heurne. En in 't centrum van 't darp is dr 't Stads- en Strandtoernooi, oftewel 't City Beach volleybal, voetbal en tennis. En vergeat niet de rommelmarkt op de Vriezenkamp. En dan is dr ook nog toneel op Sindèrn!
En umsgeliek za'k nog wel wat vergèten hebben te vermelden. Loa'w 't dan moar op de hette schoeven!
Hol ow goed!
H. Eurneman