'O, God nog an too!' dialectdeenst in de Oosterkerke

Op zondagaovond 24 februari is d’r ’s aovonds um zeuven uur in de Oosterkerke van Aalten een deenst in ’t Achterhooks. Joop Ormel bespölt het orgel en Rudie te Kamp is d’r ok bi-j met de trompet. . Dén aovond geet het umme: ‘O, God nog an too!’ Haost iederene van ow hef zo iets wal es uut-eropen. In ’t laeven kan een mense van alles teggenkommen en metmaken. I’j könt ow de vuuste kapot slaon teggen de mure en vleuken um wat ow of een ander ovverkommen is. Zulke leu bun ik vrogger meer dan ens teggen-ekommen in mien wark. En völle meer dan luustern heb ik op zo’n moment neet edaon, maor ik begreppe naodentied, dat ze dat genog vonnen: allene maor luust’ren. Naoderhand praoten wi’j d’r wal es wieter ovver deur: ovver hoo zee zich nao verloop van tied veulen, ovver hoo de leu um hun hen ereageerd hebt, ovver God. Was Hee d’r wal of neet bi-j?  Wee de Biebel les, markt, dat ’t vrogger, duzenden jaorn geleen, neet anders was. David, de dichter van Psalm 22, mos ‘t op ’n good moment ok effen kwiet: ‘Mien God, mien God, waorumme laot I-j Mi-j zo stomp allene?’ Wi-j wilt ‘s naor David luustren en neet allene naor um. ‘t Schöt immers al weer aardig op naor de veertigdagentied, de tied waorin wi-j stille staot

 bi-j het lienn van Jezus, onze Heer. An ’t kruus blik, dat hee maor al te good wis, wat David God al ‘s veur de veute hef egooid. Hee deed neet anders, ton ’t dree uur lang potduuster wodd’n um Um hen an ‘t kruus: ‘Mien God, mien God, waorumme laot I’j Mi’j zo stomp allene?’

Domneer Gerhard ter Maot geet veur en hee hopt völle leu te zeen en i’j mögt ok ander’n uutneudigen um met ow met te gaon, begunt um zeuven uur.

Meer berichten