Lezers schrijven Ankh Gussinklo

Ni-je politiek…

Beste Leu, misschien he’j mi-j - al dan neet as kiespiene - emist in dit heuksken? Kwam veural deurda’k an een hoop dinge weinig t(r)ouw meer kon vasteknuppen. Bovendien was ‘t meeste ni-js, in de paar dage tussen schrieven en publicatie vake alweer dree keer veranderd. 

Toch begunt ‘t mi-j soms zó te kriebelen, da’k toch weer veur de biele gao. 

Dit op gevaor af dat’t een soort ‘Mona Keijertjen’ wordt. Ik bedoel, dat dit in de krante kump terwijl ze (misschien?) endelijk kans zeet um iets van een ni-j kabinet - gammel of neet - in mekare ziet te timmern. En da’k ze hiermet dus aardig veur de veute lope. Afijn; an d’n Hofviever laest ze Aalten Veuruut (en De Band) jo toch neet... 

Bovvendien he’k zo’n donkerbroen vermoeden da’k neet d’n enigsten bunne waorbij ‘t vertrouwen aardig is eslonken onderhand. Ondanks alle miljarden wiet ons inmiddels um de aorne vleegt.

Góed; niet da’k now persee elk standpunt van Mona Keijzer dele. Maor um eur now ‘rücksichloos’ te ontslaon umdat zee ons ‘t eure leet wetten? 

Túúrlijk snappe wi-j dat de maniere waoróp teggendraods was. Laes; veurál hartstikke teggen de mores van de (Olde(!) politiek in is. 

Maor dát is’t um now juust! Want ‘t zol toch allemaole anders worden? Met Ni-j Leiderschap, meer Openheid en dat soort van beloftes?

Um nog te zwiegen aover dee z.g. ‘hooggeplaatsten’ wiet met al eur ‘legaal’ belasting-gevoezel nóg met dreuge ogen beweert ‘geleufwaerdig’ te waen. 

Denkt ze now écht dat fatsoenlijke mensen wiet deur denzelfden belastingdienst kapot emaakt bunt, daor nog intrapt? 

Voorts vraog ik mi-j nog egals af waor al dee stemmen zweeft wiet een Pieter - en now ok Mona - veur eure (ex)parti-je hebt binnen eslöpt.

Kortgezegd; ‘Ni-jen Politiek’? Mi-j liekt ‘t meer ni-jen wien in olde zäkke, eerlijk gezegd... 

(O ja, al bi-jveurbaat mien excuus veur d’n on-Aaltensen toon van’t epistel.)

Ankh Gussinklo

Meer berichten
 

Dagelijks het laatste nieuws in je mailbox ontvangen?

Aanmelden