Lezers schrijven | In wat veur tied ... (2)

In wat veur tied… (2)

Inderdaod; in wat veur tied laeve wi-j eigenlijk vandage d'n dag?

Eigelek deur iets héél simpels in de afgelopen waeke, wier ik d'r zogezegd met de neuze baovenop edrukt, namelek: Intied at ik intensief op d'n bujenradar zat te loern, dreigen mien de wasse drietenat te raengen.

Gelukkig had mienen man de kop d'r bi-j, anders…

Ik von 't eerlijk gezegd wal een mooien metafoor veur völle dinge van teggenswoordig. Onder andere da'w, ondanks alle 'laevenslessen' van 't afgelopen jaor – of misschien juust wal daordeur – árgens een stuksken zekerheid zuukt. Is't niet op internet dan wal bi-j de persconferentie. Is't niet middels 't vaccineern dan wal via de teststraote, de politiek, 't OMT of desnoods richting et zogenaamde 'compleet- of complotdenken'.

Maor welke kante a'j ok uutdenkt: De énige zekerheid wie'w d'r uuthaalt is dat 't laeven now eenmaol niet maakbaor is. Tóch…?

Aoverigens; den bu'jenradar had alles met dauwtrappen te maken. (Na, ja, met een betjen tiedsverschil inzake vrogger, dan.)

Afijn, wi-j hebt dus nao d'n lesten persconferentie d'r niet metene een reisgids bi-j epakt maor d'n fietsatlas. Want wat veur een ander misschien de Canarische eilanden bunt, is veur ons een fietsknopenroute. D'n fietsdrager vervengk 't vliegtuug, en 't terras een benksken langs de weg. Of in 't meest luxe geval een Röstpunt.

Daor bu'w bi-j lange nao neet de enigsten in maor aevengood: Nárgens gin antasting van d'n anderhalven meter of wat veur corona-kopzorg dan ok.

Baovendien; ondanks da'w now al zo'n 50 jaor op onze 'Pedalen van Plezier' 't land deurkruust, kwamme wi-j toch nog weer op waege waor wi-j nooit ewest waarn. En zeie wi-j veur de zóvölste kere teggen mekare: “Wat is onzen Achterhook toch allebastend mooi!”

Kortum; wi-j wanen ons op Hemelvaartsdag andermaol weer in een Aards Paradies!


Ankh Gussinklo

Meer berichten
 

Dagelijks het laatste nieuws in je mailbox ontvangen?

Aanmelden