Lezers schrijven | In wat veur weld... (1)

In wat veur weld... (1)

Beste leu, he'j 't al eheurd? Moeder Aerde is ziek. Eigenlijk al wal sinds d'n veurigen eeuw. 't Begon met hyperventilatie. Maor ja, zoiets wordt wal vaker onderschat. Afijn endelijk, toen ze al host gin aom meer kreeg, sloeg ze alarm. En de dokters um eur heer an't rikraon: “Wat zolt können waen? Longontstaeking? Hartfalen? De galle misschien?” Verschillende specialisten stellen – elks veur zich - een diagnose en govven eur een voest vol millesienen te sloeken.

Dat terwijl Moeder Aerde één en andermaol angaf dat eur de galle weliswaor beheurlijk aoverleep, maor dat 't allemaole weinig méér was as symptoombestrieding. Want ze vulen an eur water dat d'r méér an de hand was. Allene al 't feit dat daor dooie vissen in dreven, en ze -ongewild- al lange tied een hoop plestic binnenkreeg.

“Maor dat niet allene”, zei ze: “Volgens mi-j bun'k totaal op ebrand. Aoverspannen, zeg maor! Eeuwenlange he'k alles edaone um't de mensen naor de zin te maken. Maor ze lepen aover mi-j heer. En zaogen mi-j compleet leug. Waarschienlijk umdat de 'Economische Greui' heilig was verklaord. Zo prees men de Welvaart d'n hemel in, maor walsen tegeliekertied 't Welzijn onder. Wier de ene helfte van miene kinderschare rieker, en de andere helfte de dupe. Oftewal – in aerdetermen esprokken - schoffelen de baovenlaoge de onderlaoge systematisch onder. Maor da's, zei Moeder Aerde, téggen miene natuurwetten in en kan niet eeuwig zo deurgaon.”

Dit echter was veurasnog teggen (de meeste) dovemansoorne ezegd. Maor gaondeweg lei een ongriepbaor virus de ganse boel plat. En een periodieke (verkiezings)koorts hier en daor, meek de crisis zienderogen compleet!

Eén dink hölt Moeder Aerde now nog op de bene: “Dat uut élken Crisis een Kans geboren kan worden!”
Ik zol zeggen: “Wat let ons um de uutdaging an te gaon...”

Ankh Gussinklo