LEZERS SCHRIJVEN:In wat veur land…(6)

Inmiddels wordt 'Het Vaccin' (veiligheidshalve?) hoe langer hoe vake 'de stippe an de horizon' enuumd. Niet helemaols onterecht, eerlijk gezegd.

Want net as met de horizon, schüf ok dee stippe bi-j elken (mis)stap, egals weer een endjen wieter op. Zo liekt et teminsen a'j dagelijks de ni-jsberichten d'r aover volgt. (A'j 't sowieso al volgen könt!)
't Já, dat vaccin… De (grootste) helfte zit d'r met smart op te wachten. En een ander deel der natie twiefelt d'r an. Zit in tweestried. Aover de bi-jwarkingen.
Of't uberhaubt wal veilig is. Want, is't grei wal voldoende e test?
Veur de goeie orde; dan he'k et uiteraard aover leu wiet et probleem serieus nemt.
Ik zal eerlijk zeggen da'k zelf ooit, jaoren gelaene, soms ok wal's een betjen 'antie-vakserig' was. Een griepspuite kwam d'r bi-j ons nooit in, want och: Zo'n griepjen één keer in't jubeljaor, kan een wieters gezond mense nog wal an.
Zelfs kon't mi-j soms verbazen da'w vrogger, zonder d'r wieter aover nao te denken, onze kinder an zo'n 'bombardement' van inentingen hebt 'bloot esteld in eur eerste laevensjaor.
Tóch vin'k anno 2021 -en midden in een pandemie- veur mi-jzélf, dat 't misschien ok iets met solidariteit te maken hef. Nog lós van 't feit da'j 't liever zelf niet kriegt. Umdat corona helaas gin 'gewoon griepjen' liekt te waen.
Dus; now eenmaol samen in één en't zelfde covid-schuitjen zit, mo'w ok zorgen da'w ons daor met mekare weer uutwörgelt!
Maor dán? Vervólgens? 'Gewoon' fluitend weer wieter gaon? Op d'n olden (eco)voet? Zo van: “Wiet dan laeft, wiet dan zorgt! (veur wal weer een volgend vaccin?”)
Ik dácht 't eig'lijk neet! Want wie is der bi-j gebaat dat een stippe an de horizon op een kere een fata morgana zal blieken…?


Ankh Gussinklo

Meer berichten
 

Dagelijks het laatste nieuws in je mailbox ontvangen?

Aanmelden